2008 (Nr.60)

Vetëm mendjemadhi shtiret se nuk ka nevojë për ndihmën e askujt dhe kësisoj të gjitha të mirat ia përshkruan vetvetes dhe për të këqijat fajëson të gjithë ata që ka pranë. Ndërsa ai që zotëron edhe tiparet më të vogla njerëzore, të mos flasim për tiparet e një besimtari të denjë, për çdo sukses që arrin dhe për çdo të mirë që përjeton, të cilat mbase i ka fituar pas një mundi të madh personal, ky njeri mundohet të shprehë mirënjohjen dhe falënderimin ndaj atij që e ka ndihmuar. Iu drejtohet ndihmëtarëve me falënderim dhe Ndihmëtarit të vërtetë në veçanti. Myslimani është i bindur se Allahu është Ai që ia jep përkrahjen robërve të Vet në çdo punë të mbarë, Ai jep ndihmën e Tij aq sa kanë merituar, por shpeshherë jep edhe më shumë se kanë merituar. Jep më shumë, sepse mëshira e Tij ka tejkaluar zemërimin e Tij dhe se punët e mbara ka marrë përsipër t’i ndihmojë. Ai ka thënë: “Gjithsesi, Allahu e ndihmon këdo që e ndihmon Atë”.

Mirënjohja dhe falënderimi çdoherë mbetet cilësi e theksuar e besimtarit dhe këtu s’kemi pse të habitemi kur kemi parasysh se gjatë natës dhe ditës, me dhjetëra herë lexojmë: “elhamdu lilahi rabbil alemin – Falënderimi dhe lavdërimi i takon Allahut” dhe kësisoj mësohet shpirti ynë që të shprehi mirënjohjen ndaj secilit që na jep edhe përkrahjen më të vogël.

Prandaj, nëse dëgjojmë se një besimtar thotë: “Kush ma mëson një shkronjë jam i gatshëm të bëhem rob i tij” nuk habitemi, sepse besimtarët njohin madhështinë e dijes dhe kuptojnë rëndësinë e të qenit besimtar i mirë. Prandaj ai që bëhet shkak që e mira të jetë e qartë, duhet falënderuar dhe respektuar. Në revistën tonë, një gjë të tillë e kanë mundësuar dhe po e mundësojnë shkrimet dhe punimet e hoxhallarëve, që ju të nderuar lexues i lexoni në çdo numër të revistës. Allahu i shpërbleftë dhe ua shtoftë dijen, mirësinë dhe sinqeritetin.

Jo më pak, falënderimin dhe mirënjohjen tonë e meritoni edhe ju lexues të nderuar, të cilët – pas Allahut – e ndihmoni këtë revistë në mënyra të ndryshme, duke filluar nga leximi i punimeve e deri te abonimet dhe donacionet e sinqerta. Madje, çdo ndryshim që vëreni nga ky numër është bërë edhe me ndihmën tuaj, të cilët me anë të plotësimit të pyetësorit që ua kemi dërguar, na treguat sa kishim punuar dhe si duhet punuar edhe më mirë. Shpresojmë që kjo lidhje të bëhet edhe më e fortë në të ardhmen, sepse duhet të bëhemi edhe më të mirë, apo jo?

Ah, mos të harrojmë të shprehim mirënjohjen edhe ndaj MPB të RM-s, të cilët na bastisën zyrat dhe deshën të na pengojnë nga puna, por na duhet të themi se kjo na e shtoi edhe më shumë vullnetin për të punuar. Pasi jam mirënjohës do të lutem sinqerisht që edhe atyre t’u shfaqet e vërteta, si e vërtetë me qëllim që ta pasojnë dhe e pavërteta t’u shfaqet si e tillë, me qëllim që sa më lehtë ta braktisin atë.

Ju urojmë lexim të këndshëm në revistën tuaj dhe tonën njëkohësisht dhe ju porosis që motoja jonë për mirënjohjen le të jenë fjalët e Muhamedit, paqja e lavdërimi qofshin mbi të: “Shfaqja e dhuntive të Allahut është mirënjohje dhe fshehja e tyre është mohim. Ai që nuk falënderon për pak, nuk di të falënderojë as për shumë. Ai që nuk falënderon njerëzit, nuk di të falënderojë as Allahun. Bashkimi është bereqet ndërsa ndarja është dënim”.