Arabia Saudite ka qenë dhe mbetet një prej faktorëve më të rëndësishëm në jetën fetare, arsimore dhe shpirtërore të myslimanëve në Ballkan dhe veçanërisht në Republikën e Maqedonisë së Veriut. Roli i saj nuk është simbolik, por i dukshëm, i vazhdueshëm dhe i domosdoshëm për zhvillimin e komunitetit tonë. Vite me radhë, institucione saudite kanë garantuar kuota të mjaftueshme dhe shërbim të rregullt për mijëra haxhilerëve që realizojnë dëshirën e tyre të madhe për të kryer Haxhin. Standardi i lartë i organizimit, kujdesi për haxhinjtë dhe përkushtimi në ofrimin e kushteve më të mira kanë bërë që shumë haxhilerë të vendit tonë ta përjetojnë këtë obligim fetar me dinjitet dhe siguri.
Po aq i rëndësishëm është edhe roli i Arabisë Saudite në arsimimin e të rinjve nga Maqedonia dhe Ballkani. Universitetet e saj prestigjioze kanë hapur dyert për qindra studentë tanë, duke u ofruar arsim cilësor, bursa të plota dhe një përgatitje akademike që ka formuar imamë, mësues dhe kontribuues të vyer në komunitet. Ata që janë kthyer prej andej përbëjnë sot një kapital intelektual të çmuar, që kontribuon në ruajtjen e moderimit, dijes së pastër dhe udhëheqjes së shëndoshë fetare.
E gjitha kjo forcohet nga fakti më i madh shpirtëror: Arabia Saudite është zemra e botës myslimane, vendi ku është Kiblja jonë dhe ku miliona besimtarë e gjejnë qetësinë dhe lidhjen më të thellë me Zotin. Kjo lidhje transcendon politikën, interesat, dhe kohët; është lidhje besimi, identiteti dhe përkatësie fetare.
Marrëdhëniet mes myslimanëve të Ballkanit dhe Arabisë Saudite kanë qenë gjithmonë të qarta, të sinqerta dhe të mbështetura në respekt të ndërsjellë. Kontributet saudite në shërbimet fetare, arsim, projekte humanitare dhe në ruajtjen e stabilitetit fetar në rajon kanë qenë të vazhdueshme dhe të pandalshme. Si rezultat, ky vend mbetet një partner thelbësor dhe një shtyllë e rëndësishme e zhvillimit shpirtëror dhe institucional të myslimanëve në Maqedoni.
Prandaj, vlerësimi për Arabinë Saudite nuk është vetëm çështje mirënjohjeje, por çështje drejtësie dhe faktesh të qarta. Kontributet e saj janë reale, të prekshme dhe me ndikim të madh në jetën tonë fetare dhe shoqërore. Për aq kohë sa Qabja mbetet qendra e faljes tonë, Arabia Saudite do të mbetet gjithmonë qendra e respektit, mirënjohjes dhe vëllazërisë së myslimanëve të këtij vendi.
Mr. Nusret Ramadani
