Allahu i Madhëruar thotë:
“O bijtë e Ademit! Merrni stolitë tuaja (vishuni bukur e me pastërti) për çdo falje (namaz), dhe hani e pini, por mos e teproni! Vërtet, Ai nuk i do ata që e teprojnë.” (A’raf: 31)
Ky ajet fisnik na mëson se veshja e pastër, e hijshme dhe me dinjitet përpara namazit nuk është vetëm çështje zakoni, por urdhër hyjnor.
Po ashtu, Nafi’u transmeton se Ibn Umeri e pa duke u falur me një rrobë të vetme dhe i tha:
A nuk të kam veshur me dy rroba?
Tha: Po.
Ibn Umeri i tha: Sikur të të dërgoja te filani, a do të shkoje kështu?
Tha: Jo.
Atëherë i tha:
“Allahu është më i denjë që të zbukurohesh për Të!”
(Musannef Abdur-Rezzak, 2/76)
Ky qëndrim tregon respektin dhe vetëdijen e thellë që kishin sahabët për pozitën e namazit. Nëse përballë një njeriu të rëndësishëm nuk do të paraqiteshe me një pamje të thjeshtë e të neglizhuar, si mund të qëndrosh para Krijuesit të gjithësisë me papërgatitje e pa kujdes?
Namazi është takim me Allahun. A nuk ia vlen të përgatitemi për Të më shumë se për çdo takim tjetër?
Zbukurohu me pastërti, me përulësi dhe me vetëdije — sepse Allahu e meriton më shumë se kushdo tjetër!
17/04/2025
