Drama suedeze e djegies së Kur’anit Fisnik nuk është asgjë e re për muslimanët në mbarë botën. Nën fasadën e tyre paqedashëse që mbështet lirinë, fshihet një urrejtje e rrënjosur thellë ndaj Islamit dhe muslimanëve. Një veprim i tillë automatikisht ngjall pyetjen te secili prej nesh se pse një komb skandinav që supozohet të jetë tolerant dhe liberal, ka lejuar një urrejtje të tillë ndaj Islamit?
Kjo është për shkak të injorancës së tyre të përgjithshme për fenë dhe përshkrimit të vazhdueshëm, djallëzor dhe negativ që i mvishet Islamit nga mediat dashakeqe. Shumica e tyre nuk e kanë lexuar kurrë Kur’anin si duhet. Ata nuk e dinë se çfarë përfaqëson ky libër hyjnor dhe nuk e kanë idenë se çfarë mësime pêrçon feja me rritje më të shpejtë në botë.
Ata ndoshta nuk e dinë se sikur t’i digjnin të gjithë Kur’anat që ekzistojnë në Suedi, sërish nuk do të jenë në gjendje ta zhdukin Kur’anin nga Suedia, sepse Kur’ani është në kujtimet e mijëra muslimanëve suedezë dhe miliona muslimanëve në mbarë botën. Ne, komuniteti global musliman do të financojmë secili individualisht me kënaqësi në botimin e miliona kopjeve të Kur’anit dhe do ta vërshojmë Suedinë me të. Kur’ani Fisnik nuk ngjason me asnjë libër tjetër, ai është një libër i gjallë, një kushtetutë për shtet dhe udhëzim i jetës së kësaj bote në aspektin fizik, psiqik dhe shpirtëror për mbarë njerëzimin, si dhe udhërrëfyes drejt suksesit në botën e amshueshme.
Ata ndoshta nuk e dinë që Kur’ani është libri më i lexuar në botë. Dikush diku në botë po lexon Kur’an në çdo sekondë të kohës tokësore. Asnjë libër tjetër nuk lexohet, mësohet përmendësh dhe zbatohet sikur Kur’ani. Mendjelehtët, me cirkun e tyre të neveritshëm të djegies së Kur’anit vetëm se do ta rrisin leximin e tij edhe më shumë dhe më shumë njerëz do ta shkarkojnë atë nga interneti ose do të përpiqen të blejnë një kopje nga një librari lokale. Marifeti i tyre i ulët do të gjenerojë më shumë publicitet pozitiv për Kur’anin.
Ata ndoshta nuk e dinë se Kur’ani është i vetmi libër në fytyrën e tokës që nuk përmban asnjë gabim të vetëm gjuhësor, historik apo shkencor edhe pse i është shpallur 1400 vjet më parë një njeriu që nuk dinte shkrim-lexim dhe jetonte në mes të Gadishullit Arabik. Për më shumë se 1400 vjet shumë janë përpjekur të tregojnë gabime në Kur’anin Famëlartë, por ata dështuan keq. Pavarësisht se sa njerëz e djegin Kur’anin dhe sa njerëz e kritikojnë atë, Kur’ani aspak nuk ka ndryshuar, dëbuar apo braktisur.
Ata që janë të prirur për djegien e Kur’anit, le ta djegin atë, sepse një gjë është e sigurtë: nga një djegie e Kur’anit do të dalin miliona kopje të botuara të Kur’anit, do të ribotoheshin, do të shpërndaheshin në Suedi dhe si pasojë, mijëra njerëz do ta përqafonin Islamin.
Djegia e Kur’anit është një akt marrëzie, por suedezët e zakonshëm nuk janë budallenj. Ata do të shohin të vërtetën pas këtij akti marrëzor. Ky akt i djegies së Kur’anit është më shumë simbol politik i urrejtjes, jo manifestim i sjelljes së civilizuar të një personi të arsimuar. Janë për keqardhje djegësit e Kur’anit sepse duken kaq të dhimbshëm dhe veprimi i tyre duket kaq i neveritshëm. Unë nuk i urrej ata, i ftoj të mësojnë më shumë rreth Islamit. Unë i ftoj ata që të kenë një bisedë të sinqertë me bashkëkombësit e tyre muslimanë suedezë.
Politikanët e krahut të djathtë shpesh përdorin Islamin dhe emigracionin në mënyrë të ndërsjellë. Ata mendojnë se të gjithë emigrantët me ngjyrë (kryesisht ngjyrë kafe) janë muslimanë. Ata mendojnë se njerëzit me qëllim largohen nga vendet e tyre ku dielli shkëlqen 365 ditë në vit, ku klima është e ngrohtë, toka është pjellore dhe natyra është e gjallë me qindra lloje kafshësh dhe bimësh. Ata nuk e kuptojnë se ata emigrantë po u shpëtojnë luftërave që evropianët i kanë nisur dhe financuar, i ikin persekutimit dhe shtypjes që është përdorur nga regjimet e montuara që evropianët
kanë instaluar dhe mbështetur dhe i ikin varfërisë që ata kanë përjetuar për shkak të qindra viteve ekonomike dhe financiare të shfrytëzimit politik nga evropianët. Të fajësosh emigrantët do të thotë të jesh totalisht i pasinqertë në lidhje me rolin e kaluar dhe të tashëm të evropianëve në krijimin e botës së ekstremeve.
Ata fajësojnë Islamin për rritjen e numrit të njerëzve që vijnë në vendin e tyre për të kërkuar azil. Ata janë aq të ndezur saqë nuk shohin se kjo rritje e lëvizjes popullore është e lidhur drejtpërdrejt me qindra vjet kolonializëm, shfrytëzim dhe skllavërim të jo-evropianëve anembanë globit, si dhe pasojat e dekadave të politikës së jashtme joetike. Kundërvajtjet e evropianëve në mbarë botën kanë krijuar fenomenin e kthimit – njerëzit e persekutuar dhe të shfrytëzuar të botës tani po kthehen në Evropë për të kërkuar azil dhe drejtësi.
Për fund, mendoj se ata që e djegin Kur’anin mund të bëhen muslimanë nëse e lexojnë para se ta marrin hapin për ta djegur. Ju që kurrë nuk e keni lexuar këtë libër hyjnor, provojeni ta lexoni dhe do vëreni ndryshimet në veten tuaj rreth botëkuptimit ndaj Islamit dhe shpëtimit nga kriza e mendimit të gabuar për muslimanët.
Amir Shabani
