VLERA E DHJETË DITËVE TË FUNDIT TË RAMAZANIT:
Të nderuar vëllezër: Tashmë kemi hyrë në dhjetë ditshin e fundit të këtij muaji të bekuar, këto netë të fundit ngërthejnë në veten e tyre veçori dhe vlera të mëdha.
I dërguari i Allahut e angazhonte veten e tij në këto netë të fundit në kryerjen e veprave të mira, e shtonte intezitetin e ibadetit më shumë se në netët tjera.
Në sahihun e Muslimit, nga Aisheja, radijAllahu anha, tregon se pejgamberi, alejhi selam, jepte mund dhe e angazhonte veten e tij në dhjetshin e fundit më shumë se netët tjera.
Në Sahihun e Buhariut dhe Muslimit, nga Aisheja, radijAllahu anha, tregohet se ka thënë: “Kur hynte dhjetëditëshi i fundit, Pejgamberi, sal-Allahu alejhi ue selem, shtrëngonte izarin, falte namaz gjithë natën (e kalonte natën në adhurim) dhe për këtë zgjonte edhe pjesëtarët e familjes.”
Në musnedin e Imam Ahmedit, transmetohet se Aisheja, radijAllahu anha, ka thënë: ” I dërguari i Allahut, salallahu alejhi ue selem, njëzetëditëshin e parë të Ramazanit e pêrizente gjumin me namaz(falej natën por edhe flente një pjesë të saj). Ndërsa, në dhjetëditëshin e fundit e shtrëngonte izarin dhe e kalonte tërë natën në namaz.”
Këto hadithe na mësojnë se këto dhjetë netë të fundit kanë vlera të mëdha, dhe muslimani duhet të angazhohet më shumë se në netët tjera të Ramazanit. Nuk duhet të anashkalojë muslimani edhe familjën e tij nga angazhimi i tyre për ibadet, duke i këshilluar që edhe ata të kalojnë pjesën e madhe të kohës në ibadet, ngase një gjë të tillë e vepronte edhe i Dërguari i Allahut, sal-Allahu alejhi ue selem.
Këto dhjetë netë të fundit është edhe nata e kadrit, e cila është më me vlerë se njëmijë muaj. Kush e kalon këtë natë në adhurim me bindje dhe shpresë tek Allahu, atij do t’i falen mëkatet e vepruara më parë.
I dërguari i Allahut, sal-Allahu alejhi ue selem, ka thënë: “Kush falet (e kalon natën në adhurim) në natën e kadrit me bindje (iman) dhe shpresë (duke llogarit në shpërblimin e Allahut) do t’i falen mëkatet e vepruara më pare (të kaluarat).” Mutefekun alejhi (Buhariu dhe Muslimi).
“Nate e kadrit është më me vlerë sesa njëmijë muaj.” (El Kadr: 3).
Përpos këtyre vlerave që u cekën më lartë, në këtë natë zbresin nga qielli edhe krijesat e Allahut, melaiket.
“Engjëjt dhe Xhebraili, me lejen e Zotit të tyre, zbresin në të, për të zbatuar (të gjitha) urdhërat e Zotit.” (El Kadr: 4).
Muslimani në këtë natë duhet t’i shpeshtojë edhe lutjet e tij.
Transmetohet se Aisheja, radijAllahu anha, ka thënë: Thash: “O i dërguar i Allahut, nëse e arrijë natën e kadrit, çfar duhet të them (lutem)? Thuaj: O Allahu im, Ti je Falës, e do faljen, më falë mua.” (Tirmidhiu).
Gjithashtu, ky dhjetëditësh i fundit, karakterizohet edhe me hyrjen në Itikaf:
Në sahihun e Buhariut dhe Muslimit, transmetohet se Ibën Omeri, radijAllahu anhuma, ka thënë: “I Dërguari i Allahut, sal-Allahu alejhi ue selem, hynte në Itikaf në dhjetëditëshin e fundit të Ramazanit.”
Ky hadith, është argument për legjimitetin e Itikafit në Islam. Itikaf, dmth: Izolimi në xhami me qëllim afrimi tek Allahu.” Itikafi nuk është obligim, por është adhurim vullnetarë (nafile).
Ibën Kajimi, rahimehullah, e sqaron arsyen e Itikafit dhe qëllimin e tij në Islam: “Itikafi u bë legjitim në sheriatin islam që zemra e njeriut të shkëputet nga dynjaja e krijesat dhe t’i drejtohet vetëm Allahut e ta lidh zemrën e tij me Allahun. Ta mbush zemrën me adhurim dhe dashuri ndaj Krijuesit të Tij. Ta ndjejë dhe shijoj kënaqësinë e adhurimit të cilin e bënë gjatë Itikafit, njëherit ky është një nga qëllimet më madhore të Itikafit.”
Shejh Muhamed Ibën Salih el Uthejmin, rahimehullah.
Nga arabishtja: Suad B. Shabani
Burimi: albislam.com
