Gjithashtu prej shenjave të suksesit për një njeri është kërkimi dhe përkujdesi për dituri.
Përse?
Sepse kërkimi i diturisë është dritë, dhe është rrugë e kënaqësisë, derë e devotshmërisë dhe shenjë e suksesit, njashtu është rrugë e shpëtimit që të shpie deri në xhenet.
“dhe thuaj: O Zot, më shto diturinë.” Taha, 114.
I dërguari (sal-lAllahu alejhi ve sel-lem) ka thënë: “kush merr një rrugë për të kërkuar dituri, Allahu ia lehtëson atij rrugën për në xhenet.” E shënon Muslimi.
Poeti thotë:
Vlerë e vetme është për të diturit, se ata janë udhërrëfyes për të tjerët që udhëzim kërkojnë
Vlera e secilit njeri është për aq sa dituri ka arritur, e injorantët janë armiq të vërtetë të njerëzve të ditur.
Merr dituri e do të jetosh i gjallë, përherë, ngase njerëzit konsiderohen të vdekur e dijetarët të gjallë.
Për këtë, përderisa ec në rrugën e diturisë, kërko prej Zotit sukses dhe bereqet, e kujto fjalën e ibën Hushrum (Allahu e mëshiroftë) kur thotë: shpeshherë ibën Tejmije thoshte: të kesh pak suskes është më mirë se sa të kesh shumë dituri.
I dërguari (sal-lAllahu alejhi ve sel-lem) ka thënë: “kujt Allahu ia do të mirën i jep kuptimin e fesë.” E shënon Buhariu dhe Muslimi
Kjo tregon se një prej shenjave të suksesit është edhe kuptimi i fesë, pse? Sepse në atë mënyrë adhurohet Allahu me përpikmëri dhe saktë. Ky njeri thërret edhe tjetrin bazuar në dituri, mendjemprehësi dhe udhëzim, sikur njerëzit të dinë! Njashtu shiko edhe ata të cilët ecën drejt rrugës së dijes dhe mësimit, për vlerën, bujarinë dhe suksesin e tyre.
Ebu Darda (radijAllahu anhu) transmeton se i dërguari i Allahut (sal-lAllahu alejhi ve sel-lem) ka thënë: kush merr rrugë për të marrë dituri, Allahu ia lehtëson atij rrugën për në xhenet, dhe se melekët shtrojnë krahët e tyre, në shenje kënaqësie për kërkuesin e diturisë.”
Ibën Kajimi (Allahu e mëshiroftë) duke lavdëruar dhe duke treguar dashurinë për diturinë thotë: sikur dituria të merrte pamje do të dukej më e bukur se pamja e diellit dhe e hënës, dhe ne të gjithë duhet të dijmë se me fjalën (ikre) “lexo” shpërthyen burimet e diturisë, urtësisë, dritës, udhëzimin dhe suksesit në gjithë horizontin: “Lexo me emrin e Zotit tënd, i cili krijoi (çdo gjë). Krijoi njeriun prej një gjaku të ngjizur (në mitrën e nënës). Lexo! Se Zoti yt është më bujari! Ai që e mësoi (njeriun) të shkruajë me pendë. Ia mësoi njeriut atë që nuk e dinte.” Alek, 1-5
Ibën Xheuzi këtu na jep një deklaratë të fuqishme, sikur na thotë: O ti që ke vullnet të dobët, sikur ta dije dobinë e diturisë, do të qëndroje natën pa gjumë e ditën i etur, e veprat vullnetare do t’i shndërroje në marrje të diturisë.
Ja, gati se në çdo xhami janë lajmërimet për ligjërata të ndryshme, shko, merr pjesë, në ato ndeja, në ato takime, organizime, pikniqe e seminare, e që të gjitha janë thesare që i ke para duarve tua.
Nuk ka asgjë që të pengon, nuk ka punë që të preokupon, atëherë ku je?
Allahu e mëshiroftë thënësin e frazës: me laps deri në varr.
Për në fund, imam Ahmedi (Allahu e mëshiroftë) thotë: Njerëzit janë më të nevojshëm për dituri se sa nevoja e tyre për ushqim e pije, sepse për ushqim dhe pije ka nevojë një apo dy herë në ditë, kurse për dituri ka nevojë saherë që merr frymë.
Malik ibën Enesi, ka thënë: Ai që kërkon dituri duhet të jetë i butë, i qetë e i devotshëm, sepse nga lumturia e njeriut është që të ketë sukses në punë të hajrit e prej mizorisë së njeriut është q të vazhdojë në gabime.
SHENJA NË RRUGËN DREJT SUKSESIT – SHENJA E GJASHTË: DITURIA ËSHTË DRITË
Përktheu: Hoxhë Shpend Zeneli
