Nga Mirdas el-Eslemij – Allahu qoftë i kënaqur me të – transmetohet se Pejgamberi (lavdia dhe paqja qofshin mbi të) ka thënë:
“Do të shkojnë të mirët, njëri pas tjetrit, dhe do të mbesin mbeturinat, si mbeturinat e elbit – apo të hurmave – për të cilët Allahu nuk bën aspak kujdes.” (Buhariu)
عَنْ مِرْدَاسٍ الْأَسْلَمِيِّ رَضِيَ اللَّهُ عَنْهُ ، قَالَ : قَالَ النَّبِيُّ صَلَّى اللَّهُ عَلَيْهِ وَسَلَّمَ : (( يَذْهَبُ الصَّالِحُونَ، الْأَوَّلُ فَالْأَوَّلُ، وَيَبْقَى حُفَالَةٌ كَحُفَالَةِ الشَّعِيرِ – أَوِ التَّمْرِ – لَا يُبَالِيهِمُ اللَّهُ بَالَةً )) صحيح البخاري – رقم : (6434)
قَالَ أَبُو عَبْدِ اللَّهِ : يُقَالُ : حُفَالَةٌ وَحُثَالَةٌ .
Imam Buhariu shton: “Thuhet: hufale dhe huthale (të dyja format janë të sakta).
“Hufale: Do të thotë ajo që është më e keqja, mbeturinat dhe papastërtitë. Në këtë hadith nënkuptohen njerëzit më të ulët dhe më të pavlerë.
“Nuk bën kujdes për ta”: Do të thotë se Allahu nuk u jep rëndësi dhe nuk u jep vlerë fare.
Shejh Ibn Uthejmini – Allahu e mëshiroftë – ka thënë:”Prandaj i sheh njerëzit duke rënë çdo vit më shumë sesa vitin e kaluar. Më parë i shihje njerëzit duke u falur natën, agjëruar ditën, duke dhënë nga furnizimi i tyre dhe duke u sakrifikuar për të tjerët.
Ndërsa sot i sheh njerëzit të kenë ndryshuar nga viti në vit për më keq: rrinë zgjuar natën në gjëra që nuk janë bindje ndaj Allahut, ndërsa ditën e kalojnë në gjumë, apo në argëtim, apo në tregti që përfshin mashtrim dhe gënjeshtra – Allahu na ruajt!
E megjithatë, ende ka njerëz që janë në fenë e Allahut dhe të qëndrueshëm – falënderimi i qoftë Atij – të paktën nga ajo që shihet. Por kriteri nuk është individi, por gjendja e përgjithshme. Prandaj, duhet pasur kujdes të mos jetë njeriu nga mbeturinat që janë si mbeturinat e elbit apo të hurmave.
Duhet të kujdeset njeriu për urdhrin e Allahut, edhe nëse njerëzit përreth janë shkatërruar, sepse, edhe nëse i godet ndëshkimi i përgjithshëm, çdo njeri do të ringjallet Ditën e Gjykimit sipas qëllimit dhe veprës së vet.”
Komenti i “Rijadus-Salihin”, vëll. 6, fq. 634
Hoxhë Agim Bekiri
14/05/2025
