Haxhi nuk është thjesht një udhëtim fizik drejt Mekës. Nuk është vetëm veshja e ihramit, qëndrimi në Arafat apo tavafi rreth Qabesë. Haxhi është shumë më tepër se kaq. Është një udhëtim i zemrës drejt pastërtisë, një thirrje për t’u shkëputur nga mashtrimet e kësaj bote dhe për t’u lidhur sinqerisht me Krijuesin.
Në këtë udhëtim të shenjtë, njeriu heq dorë nga zakonet e përditshme, pozita, pasuria, dhe vishet me petkun e barazisë dhe përulësisë, ihramin. Çdo hap në Mekën e ndershme është një hap më afër vetëdijes për madhështinë e Allahut dhe vogëlsinë e vetvetes. Haxhi është pastrim i shpirtit, pendesë e sinqertë dhe rikthim i plotë kah besimi dhe përkushtimi.
Për besimtarin e vërtetë, ky udhëtim nuk përfundon me kthimin në shtëpi. Ai vazhdon në formën e një jete më të pastër, më të ndershme dhe më të përkushtuar ndaj vlerave që përfaqëson feja islame. Haxhi është një premtim i ri, një fillim i ri, për të jetuar me devotshmëri, me besim, vetëdisim dhe me qëllim.
Pejgamberi (paqja qoftë mbi të) ka thënë:
“Kush e kryen Haxhin për hir të Allahut, dhe nuk përdorë fjalë të ndyra e as mëkate, ai kthehet si në ditën kur e ka lindur nëna e tij.”
(Buhariu dhe Muslimi)
Dhe Ibn Mes’udi ka thënë:
“Për një njeri nuk ka shpërblim më të madh sesa Haxhi i pranuar, sepse ai i fshin të gjitha gjynahet.”
Allahu ua pranoftë Haxhin të gjithë atyre që janë duke udhëtuar sivjet dhe ua mundësoftë të gjithëve që e dëshirojnë me zemër.
Përshtati:
Hoxhë Mr. Nusret Ramadani
23/05/2025
