Ju kujtoj fjalët e Allahut të madhëruar: “E, s’ka dyshim se ata që thanë: “Allahu është Zoti ynë”, dhe ishin të paluhatshëm, atyre u vijnë engjëjt (në prag të vdekjes dhe u thonë): të mos u frikësoheni, të mos pikëlloheni, keni myzhde xhennetin që u premtohej.” Surja Fusilet, ajeti 30.
“Mirëpo këtë nuk mund ta arrijë kush, pos atyre që janë të durueshëm, dhe nuk mund ta arrijë kush, pos atyre që kanë virtyt të lartë.” Surja Fusilet, ajeti 35.
“Dhe për shkak se ata duruan, i shpërbleu me xhennet dhe me petka mëndafshi.” Surja Insan, ajeti 12.
Le të meditojmë rreth fjalës (ata duruan), duruan në adhurim ndaj Zotit në një kohë kur ishin të huaj!
Duruan dhe u distancuan nga punët e këqija, nga kënaqësitë dhe mashtrimet e jetës së tyre në këtë botë!
Duruan ndaj caktimeve dhe vështirësive që u zbritën atyre!
E nuk arrin të korrë sukses në këto tri llojet përpos atij që Allahu e ka shpëtuar dhe i jep sukses.
Allahu i drejtohet të dërguarit të tij (sal-lAllahu alejhi ve sel-lem): “Ti pra, duro me një durim pa ankesë (të mirë).” Surja Mearixh, ajeti 5.
Një prej shenjave të para të suksesit që Allahu ia dhuron robit të Tij besimtar është që Allahu ta furnizojë me zgjuarsi dhe vetëkontroll në jetën e kësaj bote, kështu që e sheh atë të frikuar se mos vallë po i devijon zemra e tij, apo t’i rëshqasin këmbët pasi që të jetë forcuar, e sheh atë duke iu përgjëruar Allahut, kërkon prej Tij qëndrueshmëri dhe sukses në çdo orë dhe në çdo moment: “Zoti ynë Ti je ai që në një ditë do t’i tubosh njerëzit, ditë që për të cilën nuk ka dyshim. Allahu nuk e shkelë premtimin e vet.” Surja Ali Imran, ajeti 8.
Po, ishte një prej lutjeve më të shpeshta të pejgamebrit (sal-lAllahu alejhi ve sel-lem): O Allah! Ti je Ai i cili rrotullon zemrat, ma përqendro zemrën time në fenë Tënde.
Transmetohet nga Enes ibën maliku (radijAllahu anhu) se i dërguari i Allahut (sal-lAllahu alejhi ve sel-lem) thoshte: O Allah, Ruajtësi i islamit dhe muslimanëve, ma forco zemrën time deri në momentin kur do të të takojë Ty.
Kështu njeriu fitimtar ec në jetën e tij, i drejtuar dhe i udhëzuar deri në momentin kur ta takojë Zotin, me një përfundim të mirë dhe vepra të mira.
Ai rrugëton në këtë botë, ushqehet, martohet dhe përjeton çaste të këndshme, vepron, përpiqet e udhëton, prej vendit në vend, por zemra e tij është e lidhur për botën e përhershme.
“O populli im, kjo jetë e kësaj bote nuk është tjetër vetëm se një përjetim i përkohshëm, ndërsa bota tjetër është ajo e përhershmja.” Surja Gafir, ajeti 39
“Kush bën vepër të mirë, qoftë mashkull ose femër, e duke qenë besimtar, Ne do t’i japim atij një jetë të mirë (në këtë botë), e (në botën tjetër) do t’u japim shpërblimin më të mirë për veprat e tyre.” Surja Nahl, ajeti 97
Përktheu: Hoxhë Shpend Zeneli
Libri: Shenja në rrugën drejt suksesit
