Përgjigjet: Dr. Nasir ibn Sulejman el Umeri
Pytje: Ju përgëzoj për këtë faqe, çdoherë duke shpresuar që të bëhet një podium (platformë) në thirrje, dije, njohje dhe t’i bëjë dobi Islamit dhe muslimanëve kudo që gjenden ata.
Sigurisht se jeni të njohur për dredhitë e dashakëqijve dhe strukturat e tyre për ta rrënuar Islamin si dhe për atë që ofrojnë për ta lajthitur rininë muslimane në aspektin doktrinar, moral etj.
Pytja ime, i nderuar hoxhë:
Si ka mundësi ta edukoj fëmijën tim që t’i shmanget së ndaluarës (haramit), edhe nëse ka mundësi ta bëjë atë, kam për qëllim: si ka mundësi ta edukoj fëmijën tim që t’i shmanget haramit me të gjitha format e tij, edhe nëse ka mundësi ta veprojë atë… e të kem besim të plotë se do t’i shmanget së ndaluarës përgjatë gjithë jetës, e përmes kësaj rruge t’ia hap atij rrugët e jetës, bie fjala, nëse i ofroj atij një video, dëshiroj nga ai që t’i ikë së ndaluarës, edhe nëse ka mundësi ta bëjë. Nëse ia ofroj internetin, dëshiroj që t’u largohet faqeve të shthurura dhe të prishura, e kudo që gjendet dhe ka kanale kabllovike ta përzgjedhë atë që i përshtatet moralit dhe fesë së tij të shtrenjtë.
Si ta arrijë këtë qëllim fisnik? Nga dëshira që aspiroj për fëmijën tim është që të bëhet i devotshëm, i virtytshëm, përmirësues, sakrifikues në rrugën e Allahut.
Allahu ju shpërbleftë me të mira!
Përgjigjja:
Lavdet janë për Allahun, Zotin e botëve. Paqja dhe përshëndetjet qofshin mbi të Dërguarin tonë, Muhamedin (sal-lallahu alejhi ue selem!) familjen dhe gjithë shokët e tij…
Më pas:
Allahun e Madhërishëm e lus që t’i bekojë fëmijët e tu, të gjejnë prehje sytë e tu, nga devotshmëria e tyre. Ndër gjërat më të rëndësishme që të ndihmojnë për përmirësimin e fëmijëve janë këto:
1. Devotshmëria ndaj Allahut në fshehtësi dhe sheshazi.
2. Gruaja e sinqertë, e cila të ndihmon për ta arritur këtë qëllim.
3. Shtëpia e ngritur mbi devotshmëri, e pastër nga ndalesat, e në veçanti nga instrumentet muzikore.
4. Shoqëria e mirë, e cila i ndihmon fëmijët e tu të shmangen nga rruga e keqe.
5. Përzgjedhja e shkollave (kopshteve) të përshtatshme, për ta dërguar fëmijën tënd në to, mëngjes e mbrëmje.
6. Ngrënia e pasurisë së lejuar (hallall) dhe largimi nga të ndaluarat.
7. Angazhimi i fëmijës në gjërat që i bëjnë dobi, si dhe kujdesi për të nga shoqëria e keqe dhe lirshmëria (koha e lirë).
8. Shoqërimi me fëmijën tënd dhe lidhshmëria e madhe me të dhe ndjesia e tij se ti je i njohur për gjendjen e tij, si dhe inkurajimi në gjërat që i bëjnë dobi.
9. T’i dhurosh nga pasura jote, aq sa ka nevojë, pa e tepruar e pa ia lënë mangët.
10. Përmirësimi i gabimeve të tij me urtësi, durim, dashamirësi, vendosmëri dhe butësi.
11. Duaja dhe istigfari i shumtë (kërkim falje Allahut): Edhe ata që thonë: “O Zoti ynë, dhurona nga ngratë tona dhe trashëgimtarët tanë, ç’është prehje për sytë tanë dhe bëna shembull për të mirët!” [Kurani: 25:74]
Allahu të dhëntë sukses dhe e përmirësoftë shtëpinë dhe familjen tënde!
Dhe paqja e bekimet e Allahut qofshin mbi të Dërguarin tonë, Muhamedin (alejhi salatu ue selam) familjen dhe shokët e tij.
Përktheu:
Bekim Kokollari
