Transmeton Bejhekiu nga Ebu Saidi se i dërguari i Allahut (salallahu alejhi ve selem) ka thënë:
( صدقة السر تطفئ غضب الرب و صلة الرحم تزيد في العمر و فعل المعروف يقي مصارع السوء )
“Lëmosha e fshehtë e shuan zemërimin e Zotit, lidhja farefisnore e shton jetën dhe bërja e veprave të mira të ruan nga rastet e këqia.”
Në këtë hadith i dërguari i Allahut i numëron tre gjëra nga dyert e hajrit që sjellin dobi tejet të madha. Dy nga ato janë në veçanti, kurse e treta është e përgjithsme.
E para është lëmosha që jipet fshehurazi
E dyta është lidhjet farefisnore dhe
E treta është bërja e veprave të mira në përgjithësi.
Të gjitha këto vepra flasin për raporte të njerëzve në shoqëri, që nënkuptohet se i dedikohen një besimtari t’i realizojë në rrethin që jeton.
Lëmosha fshehurazi është e pëlqyer aq sa e shuan zemërimin e Zotit, ngaqë kur jipet në atë mënyrë, e bën që të mos e shqetësojë të varfërin dhe kur njeriu e bën që atë vepër ta dijë vetëm Zoti i tij, atëherë pa dyshim ajo vepër është e sinqertë dhe dhe veprat e sinqerta i pranon Allahu.
Sa i përket lidhjes farefisnore, Allahu i Madhëruar e ka bërë që njeriu të ketë familje, të afërmit e tij dhe këta të kenë një lidhje mes tyre dhe të trajtohen me njëri-tjetrin. Ruajtja e kësaj lidhje është nga veprat e pëlqyera të Allahut dhe është aq e pëlqyer sa që Allahu ia zgjat jetën atij personi që i mban dhe kujdeset për këto lidhje.
Sa i përket bërjes së veprave të mira në përgjithësi, kjo është ajo që Allahu i Madhëruar e do dhe ua ka porositur robërve të Tij. Robërit e Tij krahas të gjitha adhurimet që i ka urdhëruar t’i bëjnë, i urdhëron të bëjnë vepra të mira.
Allahu i madhëruar ka thënë:
“O ju që besuat, falni namazin me ruku e sexhde dhe vetëm Zotin tuaj adhurojeni. Bëni punë të mira (të dobishme), se do të gjeni shpëtim.“ Haxh: 77
Edhe i dërguari i Allahut (salallahu alejhi ve selem) i stimulon besimtarët musliman që vazhdimisht të bëjnë punë të mira se ato i mbrojnë nga rastet e këqija e të dëmshme.
Përgatiti: Ali Shabani
