Kur fjalët qarkullojnë me shpejtësinë e dritës dhe opinionet ndërtohen shpesh mbi thashetheme, paragjykime dhe të pavërteta, është e domosdoshme të rikthehemi te mësimet e pastra të fesë sonë që na udhëzojnë drejt drejtësisë, kujdesit dhe ruajtjes së nderit të njëri-tjetrit.
Dëmtimi, lëndimi dhe atakimi ndaj muslimanit është haram, për këtë Allahu i Madhëruar thotë:
يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ [الحجورات ١٢]
“O ju që keni besuar, largohuni nga shumë dyshime, sepse disa dyshime janë mëkat.”
(Sureja Huxhurat, 12)
Ky urdhër hyjnor nuk është vetëm një këshillë morale, por një ndalim i prerë për të mos ndërtuar bindje të brendshme ndaj dikujt pa prova, pa fakte dhe pa dëshmi. Mendimi i keq për një vëlla musliman mund të jetë fillimi i një vargu mëkatesh që çojnë deri në shpifje, përçmim dhe përçarje në shoqëri.
Shpifja dhe akuzat e rreme janë edhe më të rënda. Allahu thotë:
وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُّبِينًا” (الأحزاب: 58)
Ata që i lëndojnë besimtarët dhe besimtaret, duke i akuzuar për diçka që nuk e kanë bërë, në të vërtetë, i kanë ngarkuar vetes fajin për shpifje dhe një gjynah të qartë dhe të madh!
(Sureja Ahzab, 58)
Këtu flitet për ata që akuzojnë vëllezërit dhe motrat e tyre për gjëra që nuk i kanë bërë. Kjo nuk është vetëm padrejtësi njerëzore, porse është një krim moral që bart pasoja të rënda në dynja dhe ahiret.
Imam Ibn Kethiri (Allahu e mëshiroftë) duke komentuar këtë ajet, thotë: “Ata i atribuojnë besimtarëve gjëra prej të cilave ata janë të pastër, që as nuk i kanë bërë e as nuk i kanë thënë.”
Është momenti për reflektim, të ndalemi dhe të mendojmë për mënyrën se si flasim për të tjerët? A nuk është më mirë të heshtim sesa të bëhemi bartës të fjalëve që dëmtojnë dhe ndajnë zemrat? Besimtari i vërtetë është ai që i ruan vëllezërit e tij në mungesë, që kërkon 70 justifikime para se të dyshojë dhe që, nëse nuk ka asnjë provë, e mban gjuhën dhe zemrën të pastër.
Le të jemi nga ata që përhapin mirëkuptim, mirësi dhe drejtësi, e jo nga ata që mbjellin dyshime, ndarje dhe dhimbje.
Përpunoi këtë shkrim: Nusret Ramadani
29.07.2025
