Sonte pas namazit të akshamit, hyjmë në një natë shumë të veçantë, natën e mesit të muajit shaban, të njohur te disa si Nata e Beratit apo Nata e Faljes së Madhe (Nuk e gjejmë këtë emërtim në tekstet fetare por është marrë nga kuptimi i transmetimeve të ndryshme.)
I Dërguari i Allahut ka thënë: “Në këtë natë Allahu i shikon robërit e Tij dhe që të gjithëve ua falë mëkatet përpos idhujtarit dhe grindarit” (Ibën Hiban)
Imam Shafiu ka thënë: “Na ka arritur që lutja pranohet në pesë netë: natën e xhuma, netët e dy bajrameve, natën e parë të muajit rexheb dhe natën e mesme të muajit shaban.”
Ibën Tejmije thotë: “Sa i përket natës së mesme të muajit shaban, ka një vlerë të dukshme. Disa nga selefi faleshin në të, mirëpo tubimi nëpër xhamia për të gjallëruar këtë natë është bidat”
Nuk ka ndonjë adhurim të veçantë që duhet bërë as namaz e as lutje (gjithçka që transmetohet lidhur me këtë është e pavërtetë), mirëpo preferohet që këtë natë ta kalojmë me lutje, namaz vullnetar, dhikër, lexim Kurani e tjerë siç vepronin disa tabiinë të Shamit, prej tyre: Halid b. M’adan, Mekhul, Lukman b. Amir, ndërsa disa të tjerë e mohuan një veprim të tillë (Letaiful Mearif, Ibën Rexheb)
Dijetari hanefij Zejnudin ibën Nuxhejm në librin e tij ‘Bahru-Raik’ thekson që është mekruh (e papëlqyer) të tubohemi nëpër xhami për të shënuar apo gjallëuar këtë natë me adhurime.
Allahu na faltë mëkatet!
Agim Bekiri
17/03/2022
