“Kur dikush thotë: janë shkatërruar njerëzit, ai është më i shkatërruari” (Sahih Muslim)
Imam Hatabi duke komentuar këtë hadith, thotë: “bëhet fjalë për njeriun i cili vazhdimisht përmend të metat dhe të këqijat e njerëzve. Ai thotë që njerëzit janë degjeneruar, janë prishur dhe të ngjashme. E pra, kur ta bëjë këtë, atëherë ai është bërë më i shkatërruari në mesin e tyre d.m.th. ai është në gjendje më të keqe se ata për shkak mëkateve që i merr duke i turpëruar e sharë ata. Ka të ngjarë që kjo sharje atë e çon edhe në vetëpëlqim dhe mendimin se është më i miri, Allahu e di”
Ankesat e tepërta si dhe qortimet e skajshme përhapin kulturën e qëndrimeve negative dhe botëkuptimeve të errëta, dëshprimit e që janë pa dyshim një lloj degjenerimi.
Muslimani më vend që të lëshohet pas vajtimeve të këtilla, sharjeve, qortimeve, përqeshjeve e tjerë, duhet të sfidojë të keqen me alternativa pozitive, në çdo rast ku i jepet mundësia, me gjithë çka mundet, me fjalë, me udhëzime, me këshilla, me energji pozitive, me vepra…të përhap dritën e fesë me vepër para fjalës dhe me moral para këshillës. Është thënë: më mirë se të shashë errësirën është të ndezësh një qiri.
Ndize qiriun tënd, lëviz me ndonjë veprim mirësie e të dobishëm. S’ka dobi nga sharja e errësirës duke qëndruar duarkryq, kot.
Agim Bekiri
12/02/2022
