Pyetja: Si duhet që një person të bëjë nijetin e tij për të agjëruar Ramazanin? Kur duhet të bëjë nijetin?
Përgjigjja: Falënderimi i qoftë Allahut.
“Qëllimi (nijeti) nënkupton vendosmëri për të agjëruar. Është e domosdoshme që nijeti të jetë natën, për çdo natë në muajin Ramazan “.
(Fetava Lexhneh Daimeh, vëllimi 10, f.246)
“Disa dijetarë janë të mendimit se: në adhurime që është i kushtëzuar vazhdueshmëria, mjafton që të bëhet nijet herën e parë, përveç kur ndërprehet për ndonjë arsye, atëherë duhet të përsërisë nijetin e tij. Kështu që, nëse një person e bën nijet të agjërojë në ditën e parë të Ramazanit se ai do të agjërojë këtë muaj, kjo është e mjaftueshme për tërë muajin, për aq sa që ai nuk ka ndonjë arsyetim për të ndërprerë agjërimin e tij, si udhëtimi gjatë Ramazanit. Në atë rast, kur ai dëshiron të rifillojë agjërimin, ai duhet të bëjë përsëri nijet agjërimin.
Ky është mendimi më i saktë, sepse të gjithë muslimanët, nëse i pyetni, do të thonë se ata kanë ndërmend të agjërojnë tërë muajin nga fillimi deri në fund. Pra, edhe në qoftë se qëllimi nuk është realizuar në vepra, ajo është realizuar në kuptimin e dispozitës, sepse parimi bazë është se agjërimi nuk ndërprehet. Prandaj themi se nëse vazhdimësia në agjërim ndërprehet për ndonjë arsye të lejuar, dhe fillon agjërimin përsëri, nijeti duhet të ripërtërihet. Ky është mendimi që të qetëson shpirtin”.
Marrë nga: Sherh Mumti, vëllimi i 6, f. 369-370.
Islamqa.info / albislam.com
Përkthimi: Shpend Zeneli
