Allahu thotë: “Dhe Ne i bëmë ata imamë që udhëzuan me urdhrin Tonë dhe i frymëzuam ata të bëjnë vepra të mira”. Enbija, 73.
Le të mos mendojë njeriu se është vetë ai që ka shtyrë veten të bëjë vepra të mira, por përkundrazi… Dije ti o njeri, se Allahu ty të do, ndaj mos e neglizho këtë dashuri, e më pas Ai të të harrojë.
Këtë e ka thënë Imam Ibën Kajimi, Allahu e mëshiroftë. Kur i lexova këto fjalë të tija, Allahu e mëshiroftë, m’u kujtua fjala e Gjithëmëshirshmit: “Dhe Ne i bëmë ata imamë që udhëzuan me urdhrin Tonë dhe i frymëzuam ata të bëjnë vepra të mira”.
Dhe kjo fjalë iu drejtua profetëve si; Ibrahimit, Is’hakut dhe Jakubit, paqja e Allahut qoftë mbi ta. Një nga treguesit e dashurisë së Zotit të Madhëruar për robin është se Ai ia lehtëson një ibadet në mënyrë që mëkatet e tij të shlyhen dhe të ngrihet në grada. Ky ajet, e këto fjalë janë thënë për profetët e pagabueshëm, kështu që nëse e shihni veten se udhëzoheni drejt veprave të mira, qoftë namazi i natës, agjërimi vullnetar, bamirësia e fshehtë, nderimi i prindërve apo kërkimi i diturisë, falënderoni Allahun.
Llogarit arritjen e shpërblimit te Allahu dhe llogaritni të arritni pozitën e njejtë me profetët. Siç tha dikush: Nëse dëshironi të dini pozitën tuaj te Allahu, shikoni se ku ju ka vendosur Ai.
– A jeni prej njerëzve që falin namazin e natës? Apo je një nga njerëzit që vetëm kalon natën kot?
-Jeni nga ata që kërkojnë dije apo jeni prej atyre humbin kohë me punë të kota?
– A jeni prej atyre që i zgjodhi Allahu, për të cilët ka thënë Pejgamberi, alejhi selam: “Kujt Allahu ia dëshiron të mirën, do t’i japë të kuptuarit e fesë”?
-A jeni nga njerëzit që i veprojnë nafilet (veprat vullnetare)? Apo nuk i përmbahesh as edhe farzeve (detyrimeve)?
– A të zgjodhi Zoti që të recitosh vargjet e Tij çdo ditë?
Apo bën pjesë tek ata që përmenden në ajetin Kuranor: “Dhe i Dërguari tha: “O Zot, vërtet Populli im e shpërfilli Kuranin”. Kështu që ky e braktis meditimin e recitimin e Kuranit dhe veprimin sipas tij.
Llogarite veten, e mos prano, dhe mos të jesh i kënaqur, nëse nuk ke një pozitë te Zoti. Përpiquni fort në adhurimin tuaj, lutuni dhe kërkoni falje, punoni në këtë botë për ahiretin, keni në kujtesë Zotin kur jeni në vetmi, zgjateni sexhden dhe shfaqni brengat e kërkesat para Krijuesit tënd dhe lute Atë që të të mbrojë në këtë kohë nga fitnet. Sa njerëz të famshëm në tokë janë të panjohur në qiell dhe sa njerëz të panjohur në tokë janë të famshëm në qiell.
Përkthim Hoxhë Shpend Zeneli
