Allahu i Lartësuar thotë:
“Për çdo popull Ne kemi caktuar një mënyrë adhurimi (flijim), që të përmendin emrin e Allahut për atë që Ai u ka dhënë si furnizim prej kafshëve të buta. Zoti juaj është një Zot i vetëm, ndaj përuljuni Atij me sinqeritet. Dhe jepu lajmin e mirë të përulurve (të bindurve). “(Ata janë) ata që, kur përmendet Allahu, zemrat e tyre frikësohen (dridhen); ata që durojnë për atë që i ka goditur; ata që e falin rregullisht namazin dhe nga ajo që Ne u kemi dhënë, japin (në bamirësi).”
Haxh: 34–35
Në këto ajete fisnike ndodhet një lajm i madh i mirë për ata zemra që janë të mbushura me Teuhid (besim në njëshmërinë e Zotit), që ndjekin me përkushtim Sunetin e Pejgamberit të tyre ﷺ, se ata kanë të mirën e plotë si në këtë botë, ashtu edhe në botën tjetër.
Në këtë botë: jetesë e lumtur dhe jetë e pastër.
Në botën tjetër: kënaqësia e Allahut dhe hyrja në Xhenet.
Allahu i Madhërishëm thotë:
“Ata që besuan, bënë vepra të mira dhe ishin të përulur ndaj Zotit të tyre, ata janë banorët e Xhenetit, aty do të jenë përgjithmonë.” Hud: 23
Çfarë është ihbat-i (الإخبات) (përulësia e zemrës)?
Ihbati është përulja e zemrës, ndriçimi i saj me dritën e besimit, nënshtrimi ndaj Krijuesit, gëzimi dhe kënaqësia që ka zemra për Zotin e vet, si dhe shpëtimi i saj nga sëmundjet që prekin zemrat — si:
-sëmundja e dyshimit, që çon në ndjekjen e hamendjes, dhe
-sëmundja e epshit, që çon në ndjekjen e asaj që dëshiron vetja.
Allahu përmendi katër cilësi të atyre që janë të përulur ndaj Tij:
1. Zemra që dridhet kur përmendet Allahu:
“Ata që kur përmendet Allahu, zemrat e tyre dridhen.”
Dridhja e zemrës është një frikë e përzier me dashuri dhe madhërim, që buron nga njohja e bukur e Zotit të tyre. Allahu thotë:
“Vërtet, besimtarë janë vetëm ata që, kur përmendet Allahu, zemrat e tyre dridhen.”
Enfal: 2
2. Durimi ndaj fatkeqësive:
“Ata që durojnë për çfarë i godet.”
Qoftë sëmundje, varfëri apo lloj-lloj dhimbjesh dhe sprova — ata nuk zemërohen me caktimin e Allahut, por durojnë duke kërkuar kënaqësinë e Tij, shpresojnë shpërblimin e Tij dhe presin me durim për atë që Ai ka premtuar:
“Vetëm ata që durojnë do ta marrin shpërblimin e tyre pa masë.” Zumer: 10
3. Falja e rregullt e namazit:
“Dhe ata që falin rregullisht namazin.”
Kjo nënkupton se ata e ruajnë atë në kohën e vet, e kryejnë me të gjitha shtyllat, kushtet dhe detyrimet e tij, me përulje dhe përkushtim ndaj Allahut.
4. Dhënia nga ajo që u ka dhënë Allahu:
“Dhe nga ajo që Ne u kemi dhënë, japin.”
Ata japin pasurinë në rrugë të ndryshme të mirësisë, si në ato të detyrueshme ashtu edhe në ato të pëlqyeshme, duke e bërë këtë me zemër të kënaqur dhe me bindje në premtimin e Allahut për shpërblim:
“Ata që japin pasurinë e tyre natën dhe ditën, fshehurazi dhe haptas, ata do ta kenë shpërblimin e tyre tek Zoti i tyre, nuk do të kenë frikë e as nuk do të pikëllohen.”
Bekare: 274
Këta janë njerëzit që janë të përulur ndaj Allahut. Ata kanë zemra të ndjeshme, që i njohin urdhërat e Zotit me dashuri dhe frikë, durojnë në sprova, falin me përkushtim dhe japin nga ajo që kanë. Dhe Allahu i përgëzon ata me Xhenetin dhe kënaqësinë e Tij të përjetshme.
13/06/2025
