Në mesin e virtyteve më fisnike që Islami i mëson njeriut është ruajtja e fytyrës, që nënkupton mbrojtjen e dinjitetit dhe mosuljen e vlerës së vetes para të tjerëve.
Çfarë do të thotë “ruajtja e fytyrës”?
Do të thotë të jetosh me ndershmëri dhe dinjitet, pa u nënçmuar, pa u poshtëruar dhe pa kërkuar nga njerëzit me insistim e lypje.
Allahu i Lartësuar ka thënë:
“وَلَقَدْ كَرَّمْنَا بَنِي آدَمَ”
“Dhe Ne e kemi nderuar (fisnikëruar) birin e Ademit…” (Isra: 70)
Ky nderim hyjnor kërkon nga ne që të ruajmë nderin tonë, të mos poshtërohemi për gjëra të kësaj bote, dhe të mos jemi nga ata që përulen për para apo pozitë.
Pejgamberi ﷺ ishte shembulli më i madh në këtë fushë. Ai ka thënë:
“إنَّ المسألةَ لا تصلُحُ إلا لثلاثٍ، لذي فقرٍ مُدقِعٍ، أو لذي غُرْمٍ مُفْظِعٍ، أو لذي دَمٍ مُوجِعٍ
الراوي: أنس بن مالك • الألباني، صحيح الترغيب (٨٣٤) • صحيح لغيره • أخرجه أبو داود”
“Lypja nuk lejohet përveçse për tre njerëz:
Për atë që është në varfëri të skajshme, ose për atë që ka borxh të rëndë, ose për atë që është goditur nga dëm i rëndë për shkak të gjakut”
Transmeton Enes ibn Malik
Burimi: Ebu Davudi
Vlerësimi i hadithit: I saktë ( صحيح لغيره) sipas Shejh Albanit në Sahih Tergib
Ai gjithashtu ka thënë:
“والذي نَفْسِي بيَدِهِ، لَأَنْ يَأْخُذَ أحَدُكُمْ حَبْلَه، فيَحْتَطِبَ على ظَهْرِه؛ خَيْرٌ له مِن أنْ يَأْتيَ رَجُلًا، فيَسْأَلَه، أعْطاهُ أوْ مَنَعَه.
الراوي: أبو هريرة، صحيح البخاري (١٤٧٠)
“Pasha Atë në dorën e të Cilit është shpirti im! Nëse dikush prej jush e merr litarin e tij, shkon dhe mbledh dru, i mbart mbi shpinë dhe i shet – kjo është më mirë për të sesa të shkojë tek dikush dhe t’i kërkojë (diçka), e ai ose ia jep, ose ia mohon.” Buhariu
Ruajtja e dinjitetit nuk do të thotë krenari e rreme
Të mos ngatërrojmë dinjitetin me krenarinë e rreme. Islami nuk na mëson të jemi mendjemëdhenj, por të jemi të përulur para Allahut dhe të kujdesshëm me njerëzit, pa e nënçmuar vetveten.
Ndihmoji të tjerët pa i lënduar
Nëse ndihmon një njeri, mos e turpëro, mos e shaj, mos ia kujto bamirësinë. Sepse Islami na mëson se ruajtja e dinjitetit të atij që i jep diçka është njësoj e rëndësishme si ndihma që jepet.
Ruajtja e fytyrës është pjesë e besimit, e karakterit fisnik dhe e krenarisë njerëzore. Ai që e ruan dinjitetin e tij, Allahu e nderon dhe i mjafton për nevojat e tij.
“ومن يستعفف يعفّه الله، ومن يستغن يغنه الله”
“Kush ruan nderin, Allahu do ta ruajë atë. Kush përpiqet të jetë i pavarur, Allahu do ta bëjë të mjaftueshëm.” Muslimi
24/06/2025
